Í kvøld er stórur fagnaður í Hoyvík. Besta mansliðið hjá H71 hevur fyri løtu síðani í fyrru sekstandapartsfinaluni í European Cup vunnið á pólska liðnum, Rebud KPR Ostrovia Ostrów Wielkopolski sum er fjórðfremst í bestu pólsku hondbóltsdeildini.
Dysturin í Hoyvíkshøllini endaði við 33-31 sigri til H71. Í steðginum var støðan javnleikur 16-16. Liðini fylgdust til støðuna 23-23. Tá eydnaðist H71 at leggja seg á odda 26-23, og seinni til 31-27. Pólska liðið minkaði um støðuna til 31-30. H71 fekk fótað sær aftur og vann 33-31.
Boas Ellefsen á Skipagøtu og Helgi H. Hoydal gingu undan. Boas skoraði heili 11 mál, og hann legði eisini upp til seks mál. Also samantalt 17 málstig. Helgi skoraði níggju mál, og í tveimum álopsstøðum hjá pólska liðnum vann hann bóltin frá teimum.
Liðini hittast aftur í Hoyvíkshøllini í morgin klokkan 17. Tá er Rebud KPR Ostrovia Ostrów Wielkopolski tekniskt heimalið. Tapir H71 við einum máli, ella fær eitt betri úrslit enn tað vinna teir seg víðari í kappingini. Óannsæð; trýstið er á Rebud KPR Ostrovia Ostrów Wielkopolski.