Mótmælini byrja klokkan 15 íslendska tíð og verða hildin samstundis í Seyðisfirði og Reykjavík.
Tað er ætlanin hjá alifyritøkuni Kaldvík um at ala upp í 10.000 tons av laksi í aliringum í Seyðisfirði, sum hevur elvt til mótstøðuna. Sambært Vísi standa fleiri náttúruverndarfeløg og lokali felagsskapurin VÁ aftanfyri mótmælini. Katrín Oddsdóttir, løgfrøðingur og ein av fyriskiparunum, sigur, at nógv fólk væntast at møta, og hon heldur, at stórir veikleikar eru í loyvisgongdini.
Mótstøðan hevur verið stór í Seyðisfirði í fleiri ár. Í eini kanning frá 2023 søgdu 75 prosent av teimum spurdu íbúgvunum seg vera ímóti sjóaling í firðinum.
Ein fjørður, sum føroyingar kenna væl
Seyðisfjørður hevur eina heilt serliga støðu í føroyskum ferðslusambandi við Ísland.
Longu í 1975 sigldi Smyril millum Føroyar og Seyðisfjørð, og tá Smyril Line varð stovnað í 1982, tók fyrra Norrøna yvir gomlu rutuna hjá Smyrli í 1983. Nýggja Norrøna tók síðan yvir í 2003 og siglir framvegis til Seyðisfjarðar.
Tað merkir, at føroyingar nú í 51 ár hava havt beinleiðis ferðasamband við Seyðisfjørð – fyrst við Smyrli, síðani við fyrru Norrønu og nú við seinnu Norrønu.
Tí er Seyðisfjørður ikki bara eitt navn á einum íslendskum korti hjá føroyingum. Fleiri ættarlið hava komið hagar sjóvegis, og fjørðurin er vorðin sjálvur inngangurin til Ísland hjá nógvum føroyskum ferðafólkum.
Í Føroyum hava vit tó ikki havt somu mótmæli ímóti aling, sum vit síggja í Íslandi í dag.
Alingin er ikki ein trupulleiki fyri Norrønu
Tað er ikki sjálv skipaferðslan hjá Norrønu, sum er kjarnin í íslendska kjakinum. Føroyingar kenna eisini væl til, at aling og stór skipaferðsla kunnu vera í sama firði – eitt nú er nógv aling undir Argjalandinum samstundis sum stór skip dagliga sigla inn og út úr Tórshavnar Havn.
Ósemjan í Seyðisfirði snýr seg heldur um, hvørja menning íbúgvarnir vilja hava í firðinum, og hvussu tey meta um ávirkanina frá stórari laksaaling á náttúru, umhvørvi og lokalsamfelag.
Mótmælini í dag vísa, at málið framvegis er eitt stórt stríðsmál í Eysturlandinum.
