Á eykabygdarráðsfundi í Vestmanna mánadagin er fyrsta málið á skránni umskipan av bygdarráðnum og nevndunum.

Orsøkin til tað er, sigur borgarstjórin í Vestmanna, at ein bygdarráðslimur, Símun Jákup Højsted, er fluttur úr bygdini.

– Tí kann hann ikki sita í bygarrráðnum, og tí má bygarráðið umskipast, sigur Sára Jógvansdóttir, borgarstjóri í Vestmanna.

Símun Jákup Højsted varð valdur sum nummar tvey í bygdarráðið á lista A, sum var einasti listi, sum stillaði upp til bygdarráðsvalið seinast, sum var 12. november í 2024.

Hann er varaborgarstjóri, og tí skal annar varaborgarstjóri veljast í hansara stað, eins og í allar aðrar nevndir, sum hann situr í.

Næstir á listanum í Vestmanna eru Bogi Fossdal og Fróði Bjarkason Skúvadal, sum báðir fingu 42 atkvøður. Og tá so er, so verður lutakast hildið beint eftir valið. Og tað lutakastið vann Fróði Bjarkason Skúvadal, sum tí tekur sæti sum fastur limur í bygdarráðnum fyri Símun Jákup Højsted.