Eitt stórsligið náttúrufyribrigdi sæst á myndini, sum evropeiska Copernicus-skipanin hevur valt til dagsins mynd í dag.

Myndin vísir gosfjallið Erebus á Ross-oynni í Antarktis. Fjallið er umleið 3.800 metrar høgt og er syðsta virkna gosfjall í heiminum.

Tá sólin stendur lágt á luftini á hesum syðru leiðum, kastar fjallið ein langan skugga út yvir landslagið og havísin. Á myndini røkkur skuggin umleið 35 kilometrar í landnyrðing út yvir brotna havísin.

Myndin varð tikin 17. mars í ár av einum av Sentinel-2-fylgisveinunum hjá Copernicus og vísir økið í náttúrligum litum.

Umframt kavaklæddu fjallasíðurnar sæst eisini jøkultungan hjá Erebus. Hetta er ein flótandi partur av jøklinum, sum røkkur frá strondini á Ross-oynni út á sjógvin.

Fylgisveinarnir hjálpa við at fylgja gongdini í hesum fjarskotna økinum og veita upplýsingar um jøklar, havís og eldfjøll.

Kelda: Copernicus / EU Space