Víkingur var stórfavorittur, tá ið næstbesta liðið hjá steypavinnarunum í Sarpugerði seinnapartin var gestur í Hólmanum á Eiði. Men tað gekk heilt øðrvísi, enn tað frammanundan varð roknað við.
EB/Streymur, ið mest sum er flutt niður úr 1. deild, vann 4-0. Hetta var fyrsti sigur hjá EB/Streymi síðani 16. mai, tá ið EB/Streymur vann 2-1 í Gundadali ímóti B36, og hetta var triði sigurin hjá EB/Streymi í ár. Liðið hevur nú 11 stig. Tað eru fýra dystir eftir at spæla, og tað eru 9 stig fram til HB, sum spælir í morgin, og tað eru 11 stig fram til FC Hoyvík.
Manningin hjá Víkingi í dag var umleið soleiðis, sum hon hevur verið oftast fyrr í ár.
20 ára gamli Thomas Bjørn Miezan var millum teir fyrstu ellivu hjá EB/Streymi, og tíggju minuttir undan steðginum og aftur eitt lítið korter eftir steðgin var hann málskjútti. Í báðum førum var tað Fríði Holm, sum átti uppleggið. Thomas Bjørn Miezan hevur nú skorað seks mál í 1. deild í ár.
Miðskeiðis í seinna hálvleiki var tað Villiam Sørensen, sum økti um munin til 3-0. Hetta var fyrsta ferðin, at 16 ára gamli Villiam Sørensen var málskjútti í 1. deild, har hann í dag var fyri 10. ferð á liðnum hjá barndómsfelagnum. Uppleggið átti 16 ára gamli Jónas Lützen.
12 minuttir undan leikloki var tað Hannus Eiðisgarð, sum staðfesti trivaliga 4-0 heimasigurin. 16 ára gamli Marius Jónsson átti uppleggið.
Fríggjadagin fer EB/Streymur at spæla á útivølli ímóti oddaliðnum B71.
Leygardagin fær Víkingur vitjan av FC Suðuroy.
