Í sáttmálanum millum Føroya Skipara-og Navigatørfelag og Føroya Reiðarafelag er oljan ein partur, sum manningin tekur lut í, tá ræður um partar av fiskiskipaflotanum.

Nú oljan er dýr, er hetta ein ógvuliga stórur og tungur postur, sum eisini hevur stóra ávirkan á avrokningarnar - ikki minst hjá limunum í Føroya Skipara-og Navigatørfelag.

Nýggja royndin at fáa ein sáttmála í lag millum navigtørarnar og reiðarafelagið bar ikki á mál, og spurnigurin er nú, hvat næsta stigið verður.

- Vit hava roynt at fáa eina munagóða broyting á tí økinum, segði formaðurin í Føroya Skipara-og Navigatørfelag, Annfinnur Garðalíð, við KvF um dagarnar.

Hann ásannaði, at tað fyriliggur ein avtala millum partarnar um, at tá oljan fer uppum eitt ávíst krónutal, so luttekur manningin í oljuútreiðslunum.

- Men, fyri okkara viðkomandi er tað soleiðis, at vit luttaka ikki bara í einum parti, men vit luttaka eisini í øllum eykapørtum, sum okkara limir fáa.

Annfinnur Garðalíð vísti á, at um manningin eitt nú rindar einar 5000-6000 krónur í oljuútreiðslum í ein túr, sum varar einar 5-8 dagar, so noyðast limirnir hjá honum at falda hetta við hálvum øðrum ella tvey.

- So, hetta eru ógvuliga stórar útreiðslur fyri okkara limir - ja, tær eru heilt ekstremar, nú oljan er so dýr, og hetta vilja vit broyta.

Formaðurin í FSN sigur, at oljuútreiðslurnar eru ein stórur knútur í trætuni millum Føroya Skipara-og Navigatørfelag og Føroya Reiðarafelag.

- Her eru eisini nøkur onnur ting, og eg vil ikki kalla tey smáting, tí her snýr tað seg eisini um prinsippir, men oljan er ein alvorligur knútur, ásannar formaðurin.

Men, hvussu langt standa partarnir so frá hvørjum øðrum í løtuni?

- Tað veldst um eygað, sum sær. Nøkur ting eru fingin uppá pláss. Vit eru eisini samdir um viðurskiftini við nýggju trolarunum, sum skulu frysta.

Annfinnur Garðalíð sigur, at um tann samlaði pakkin ikki er upp á pláss - ja, so fellur alt til jarðar, sum formaðurin í Føroya Skipara-og Navigatørfelag tekur til.