Landsliðsliðskiparin, Ásla Johannesen kann saman við liðfeløgunum í Piteå fegnast um, at plássið í bestu svensku fótbóltsdeildini, Damallsvenskan er bjargað.
Í dag megnaði Piteå á heimavølli - uttan Áslu sum var leikbannað - at spæla javnleik 1-1 móti Malmö FF. Samstundis lagaði tað seg so væl, at Rosengård tapti 0-2 á heimavølli fyri Hammarby.
Piteå er fimtaftast í deildini við 28 stigum. Rosengård hevur 24 stig, og kann í mesta lagi røkka 27 stigum.
Sunnudagin 15. november endar Piteå kappingina við dysti á útivølli móti liðnum hjá Jóhonnu Fossdalsá Sørensen, BK Häcken, ið hevur endurvunnið meistaraheitið.
Ígjár fekk Jóhanna 68 minuttir á vøllinum, tá Häcken á útivølli móti Djurgården leikti javnt 1-1.
Häcken er greitt oddalið við 68 stigum.
