Fyrr í ár varð frystilínuskipið Kristrún keypt úr Íslandi. Skipið er komið í flotan fyri ísfiskalínuskipið, Sandshavið, og ber nú navnið Sandshavið.
Seinnu árini hava víst, at møguleikarnir við frystilínuskipum eru nógv størri enn teir eru við ísfiskalínuskipum, serliga tá roynt verður á fjarleiðum.
Eftir at nakrar dagføringar og umvælingar eru gjørdar, sum Skipasýnið hevur kravt, hevur skipið seinastu dagarnar ligið á Sandi, har riggað hevur verið til fyrsta túrin.
Bæði høvuðsmotorur og ein ljósmotorur eru yvirhálaðir.
Eyðvarur Petersen, skipari og ein av eigarunum, er spentur, nú farið er á fyrsta túrin.
- Vit fara fyrst undir Føroyar at royna skipið. Um alt gongur væl, fara vit til Grønlands at fiska okkara kvotu har yviri, sum er umleið upp í eina last.
Skiparin sigur, at tá grønlandstúrurin er lokin, eiga teir eisini upp í eina last í íslendskum sjógvi.
Sandshavið tekur millum 250 og 300 tons av frystum fiski.
- Vit eru spentir, og vit vóna, at alt fer at rigga væl rigga væl. Nýggja skipið gevur okkum møguleikar, sum vit hava droymt um í fleiri ár, sigur skiparin.
Nú Sandshavið fór á fyrsta túrin, eru bæði Eyðvarur Petersen og Virgar Hentze, sum eisini plagar at føra skipið, við, og umborð er eisini stýrimaðurin, Jóhan Hendrik Petersen.
Sandshavið hevur siglingarloyvi til 17 mans.
