Hví verður undirvísing í føroyskum sum annaðmál ikki skipað í fleiri økjum í Føroyum, eitt nú í Vágum? Tað er ein av spurningunum, sum Jóhannis Joensen, løgtingsmaður, setur Bárði á Lakjuni, landsstýrismanni í mentamálum, í einum skrivligum fyrispurningi.

Jóhannis Joensen vísir á, at undirvísingin er miðsavnað á útvaldum miðnámsskúlum. Hann spyr, hví henda loysnin er vald, og hvussu tað ber til hjá útlendskum arbeiðsfólki at ferðast til og frá undirvísing eftir ein langan arbeiðsdag.

Hann vil eisini vita, um nakrar avtalur eru við arbeiðsgevarar um at geva starvsfólkum møguleika at læra føroyskt í arbeiðstíðini ella um dagin. Harumframt spyr hann, hvussu nógvir útbúnir undirvísarar í føroyskum sum annaðmál undirvísa í dag, og hvussu land og kommunur samstarva um undirvísingina.

Í viðmerkingunum til fyrispurningin sigur Jóhannis Joensen, at tað at læra føroyskt er ein grundleggjandi partur av integratiónini. Hann stúrir fyri, at long ferðing og undirvísing eftir arbeiðstíð kunnu gera tað trupult hjá summum at nýta tilboðið. Hann heldur eisini, at samstarv við undirvísarar úti í økjunum eigur at verða umhugsað.

Landsstýrismaðurin hevur tvær vikur at svara fyrispurninginum.