Magdalena Andersson, forkvinna í svenska Javnaðarflokkinum, Socialdemokraterna, gevst við royndini at skipa stjórn. Tað sigur hon sambært svensku tíðindastovuni TT.

– Í løtuni er eingin møguleiki fyri, at eg kann skipa stjórn, sigur hon.

Boðini koma, hóast flokkur hennara og reyðgrøni vongurin vunnu ein tepran sigur á valinum fyrr í mánaðinum. Reyðgrønu flokkarnir fingu tilsamans 176 sessir, meðan fráfarandi stjórnarflokkarnir Moderaterna, Liberalerna og Kristdemokraterna saman við Sverigedemokraterna fingu 173.

Sverigedemokraterna hevur verið stuðulsflokkur hjá fráfarandi stjórnini. Flokkurin, sum serliga leggur dent á ein stramman útlendingapolitikk, fekk 17,5 prosent av atkvøðunum og gjørdist triðstørsti flokkur í ríkisdegnum. Socialdemokraterna gjørdist størsti flokkur við 28 prosentum.

Sunnukvøldið boðaði Vänsterpartiet frá, at flokkurin fer at stuðla Andreas Norlén úr Moderaterna sum formanni í ríkisdegnum. Nýggi tingformaðurin skal veljast í dag.

Vänsterpartiet hevur undirstrikað, at stuðulin til Norlén ikki broytir stuðulin hjá flokkinum til Andersson sum forsætisráðfrú.

Sambært Andersson er avgerð hennara um at sleppa stjórnarroyndini ein avleiðing av, at Vänsterpartiet stuðlar Norlén. Tað skrivar Expressen.

– Vänsterpartiet fór saman við Moderaterna. Nú er ein nýggj samanseting, og tí er tað rímiligt, at ein av flokkunum í henni fær møguleikan, sigur Andersson sambært svenska miðlinum.

/Ritzau/