Í løtuni eru fýra partrolarapør til fiskiskap eftir upsa. Skipini fáa eisini nakað av hjáveiði, men fiskiskapurin er smáligur.

- Væntandi koma nøkur pør inn at landa í næstu viku, vita tey á Fiskamarknaði Føroya at siga.

Tríggir djúpvatnstrolarar eru til fiskiskap. Teir fáa mest av svartkalva, kongafiski og toski.

- Allir djúpvatnstrolararnir koma inn at landa í næstu viku.

Lagt verður aftrat, at ein frystitrolari eisini er til fiskiskap: teir fáa mest av svartkalva.

Í løtuni er bara ein av teimum smáu trolbátunum til fiskiskap, men onkur fer helst útaftur í næstum.

- Trolbátarnir fáa mest av hýsu, toski og so nakað av flatfiski.

Fýra garnaskip eru eisini til fiskiskap. Tvey fiska svartkalva, og tvey fiska havtasku.

- Garnaskipini hava brúkiligan fiskiskap, og tey koma øll inn at landa í næstu viku, verður lagt aftrat.