Tað sær gott út hjá liðunum hjá Hákuni West av Teigum og Jóhan á Plógv Hansen, Füchse Berlin og Skanderborg-Aarhus at vinna seg víðari úr innleiðandi bólkaspælinum í Champions League.

Tað eydnaðist Füchse Berlin í útidysti í innleiðandi bólki A at vinna 36-33 á Porto. Í steðginum var Füchse Berlin á odda 19-18. Hákun skoraði eitt mál upp á tvær málroyndir, og í tí eina førinum vann hann bóltin í einari álopsstøðu hjá Porto.

Veszprem er fremst í bólkinum við fullum stigatali, átta stig fyri fýra dystir. Füchse Berlin hevur seks stig og Porto hevur tvey stig. Partizan Beograd er aftast við ongum stigi.

Jóhan á Plógv Hansen og liðfelagarnir í Skanderborg-Aarhus vunnu á útivølli í innleiðandi bólki E greiðan 38-30 sigur á franska liðnum, Montpellier. Í steðginum var Skanderborg-Aarhus á odda 18-14.

Jóhan skoraði sjey mál upp á átta málroyndir og var toppskjútti hjá Skanderborg-Aarhus. Hann legði eisini upp til eitt mál.

Barcelona er fremst í bólkinum við átta stigum fyri fýra dystir. Skanderborg-Aarhus hevur fimm stig og Montpellier hevur tvey stig. Aftast er Dinamo Bukarest við einum stigi.