Í kvøld gekk tað akkurát hjá liðnum hjá Eliasi Ellefsen á Skipagøtu, THW Kiel.
Í heimadystinum í týsku bundesliguni vann THW Kiel tepran 37-36 sigur á Rhein-Neckar Löwen, ið var á odda 20-19 í steðginum.
Eric Johansson skoraði sigursmálið upp á brotskast í allarseinasta sekundinum av dystinum.
Elias fekk veruliga møguleikan seinastu løtuna, og í teimum seinastu átta minuttunum skoraði Elias trý mál upp á tríggjar málroyndir, og hann vann eisini liðnum eitt brotskast. Samlaða spælitíðin hjá Eliasi gjørdist 19 minuttir í kvøld.
THW Kiel er fyribils fremst í deildini við 17 stigum fyri 10 dystir. Flensburg-Handewitt hevur 15 stig og SC Magdeburg hevur 14 stig, men tey bæði liðini hava leikt tveir dystir færri enn THW Kiel.
Sunnudagin klokkan 14 spæla Hákun West av Teigum og liðfelagarnir í Füchse Berlin dyst á útivølli móti Flensburg-Handewittt. Mánakvøldið klokkan 18 spæla Vilhelm Poulsen og liðfelagarnir í Hannover-Burgdorf dyst á útivølli móti Balingen-Weilstetten.
