Landsliðsliðskiparin, Pernille Brandenborg og liðfelagarnir á CSM Bukarest leiktu fyrr í dag dyst á útivølli í bestu rumensku hondbóltsdeildini móti Minaur Baia Mare.
Undan dystinum hevði CSM Bukarest fult stigatal, 10 stig fyri fimm dystir. Liðið hjá Pernille hevði eisini eina greiða favorittstøðu undan dagsins dysti.
Men tað endaði við javnleiki 32-32. Tá 10 minuttir vóru eftir av dystinum var Minaur Baia Mare á odda 31-28. Í steðginum var støðan javnleikur 18-18.
Pernille tók nógv tøk í verjupartinum, men fekk ikki so nógva framrættaða spælitíð.
CSM Bukarest er næstfremst í deildini við 11 stigum. Gloria Bistrita er fremst við 12 stigum.
Sunnudagin klokkan 15 hevur CSM Bukarest heimadyst í innleiðandi bólki A í Champions League, tá norska liðið, Sola kemur á vitjan. CSM Bukarest hevur seks stig fyri fimm dystir, meðan Sola einki stig hevur.
