Tá 22 minuttir vóru leiktir av dystinum á CASA Arena í Horsens í kvøld sá ikki gott út hjá Adriani R. Justinussen.
Laurits Pedersen hjá mótstøðuliðnum, Randers FC framdi eina grova takkling, og frásøgumennirnir hjá Viasat bóru ótta fyri, at Adrian var illa skaddur. Men lukkutíð kom landsliðsleikarin á føtur aftur. Laurits Pedersen fekk tó beinleiðis reytt.
Adrian og liðfelagarnir megnaðu tíverri ikki at gagnnýta, at teir vóru 11 móti 10 leikarum í nærum 70 minuttir.
Í 51. minutti mundi gingið púra galið hjá Horsens, tá Randers fekk brotsspark. Men lukkutíð bjargaði Matej Delac í Horsens-málinum royndini hjá Mohamed Sankoh.
Fleiri mál komu ikki, og so mátti AC Horsens taka til takkar við javnleiki 0-0.
AC Horsens er nummar seks í deildini við 13 stigum.
Sunnudagin 25. oktober klokkan 15 hevur AC Horsens dyst á heimavølli móti Sønderjyske.
