Teis Horn Rasmussen og liðfelagarnir í TTH Holstebro leiktu í dag dyst á heimavølli í bestu donsku hondbóltsdeildini móti Skjern.
Frammanfyri 2.182 áskoðarum í Gråkjær Arena tapti Holstebro 27-29 fyri Skjern. Í steðginum var heimaliðið á odda 15-14.
Teis tók sum vant síni tøk í verjuni. Í hinum endanum av vøllinum fekk hann ein málmøguleika, og hann setti hann í netið.
Liðfelagarnir hjá Teis brendu ov illa í seinna hálvleiki, har Svend Rughave í Skjern-málinum bleiv ein sonn marra hjá teimum.
Holstebro hevur bert megnað eitt stig í fýra teimum seinastu dystunum, og eru teir nummar 10 í deildini við trimum stigum.
Fríggjakvøldið vann liðið hjá Magnusi Árasyni, Mors-Thy í høllini í Thy 34-30 á Skive. Í steðginum var Skive á odda 15-12.
Mors-Thy hevur fýra stig fyri fimm dystir.
Í morgin klokkan 15 spæla Óli Mittún og liðfelagarnir í GOG dyst á útivølli móti Sønderjyske. Somu klokkutíð hava Jóhan á Plógv Hansen og liðfelagarnir í Skanderborg-Aarhus dyst á heimavølli móti Kolding.
