- Nú verður arbeitt við at gera fleiri gøtur í viðarlundini í Vestmanna, soleiðis at bæði íbúgvar og vitjandi fáa enn fleiri møguleikar at njóta vakra náttúruøkið.

Soleiðis siga tey í Vestmanna kommunu.

- Ein av nýggju gøtunum fer at ganga niðan til gjónna. Haðani verður møguligt at njóta eitt serstakliga vakurt útsýni og uppliva náttúruna úr einum nýggjum sjónarhorni.

Sagt verður, at endamálið við nýggju gøtunum er at skapa fleiri møguleikar hjá fólki at ganga og trilla túrar í viðarlundini, bæði styttri og longri túrar.

- Tað er sum altíð grøni maðurin í bygdini, Finnbogi Joensen, sum stendur fyri arbeiðinum í viðarlundini.

Í Vestmanna kommunu vísa tey á, at viðarlundin er eitt gott stað at leita sær út í náttúruna, fáa fríska luft og njóta friðin, og við nýggju gøtunum verður økið enn meira hugaligt at vitja.

- Vit fara í næstum eisini at gera eina nýggja gangibrúgv yvir um Gjógvará, millum viðarlundina og Garðatún, siga tey í Vestmanna kommunu.