Leivur Mortensen (myndin), Tróndur Mikkelsen og liðfelagarnir í HF Karlskrona spældu seinnapartin seinnu áttandapartsfinaluna í svensku steypakappingini móti Västerås-Irsta.
Við sær til dystin í Expandia Arena í Västerås í dag hevði Karlskrona ein tepran 33-32 sigur á heimavølli.
Og tað bleiv líka javnt í dag. Í allarseinasta sekundinum skoraði Jonathan Andersson hjá Karlskrona til støðuna 27-26 til Västerås-Irsta. Tað merkti samlaðan javnleik 59-59, og tí var neyðugt við brotskastskapping fyri at finna ein samlaðan vinnara.
Leivur gjørdi sítt í brotskastskappingini við at skora tvær ferðir, men tíverri fyri Karlskrona vann heimaliðið brotskastskappingina 8-7, og harvið ein samlaðan 67-66 áttandapartsfinalusigur.
Í vanligu leiktíðini skutu Leivur og Tróndur tvey mál hvør.
