Chelsea hevur í kvøld vunnið seg í Liga Cup finaluna, sum er lítla steypakappingin í Onglandi. Chelsea vann í kvøld 1-0 á útivølli móti Tottenham, og samanlagt 3-0.
Eftir 2-0 sigurin í fyrru hálvfinaluni var lítil ivi um, at Chelsea fór at vinna seg í finaluna, men tú veist ongantíð við Harry Kane. Hann er tó ikki í góða gamla málforminum, og Tottenham hevði bara nakrar fáar møguleikar í dystinum í kvøld.
Uppgávan bleiv eisini torførari, tá nógv umtalaði Antonio Rudiger legði Chelsea á odda longu aftaná 17 minuttir. Sáttmálin við týska miðverjan gongur út í summar, og tí kann hann samráðast við onnur feløg nú. Søgan sigur, at Real Madrid vil hava hann.
Chelsea skal møta Liverpool ella Arsenal í finaluni. Fyrra hálvfinalan bleiv útsett, og tí spæla liðini fyrru hálvfinaluna í morgin.
