Klokkan 19.45 verður fyrsta bríksl á Tórsvølli, har Eysturríki verður gestur.

Á tíðindafundinum í gjár ásannaði eysturríkski venjarin Franco Foda, at dysturin í Landskrona fyri 31 árum síðani sleppur Eysturríki ongantíð undan, men hann undirstrikaði samstundis, at 1-0 tapið 12. september 1990 er ikki við í fyrireikingunum til avbjóðingina ímóti Føroyum í kvøld.

Eingin av spælarunum á føroyska liðnum minnist aftur til 12. september 1990 og løturnar, tá ið Torkil Nielsen skoraði kendasta málið í føroyskum fótbólti, tá ið norski dómarin Egil Nervik bríkslaði fyri síðstu ferð hetta kvøldið og dagarnar eftir, tá ið føroyska liðið varð fagnað í Føroyum og so víðari.

Og eisini í fótbóltinum er nógv vatn runnið í ánna síðani tá. Dysturin í Landskrona var fimti altjóða skrásetti landsdysturin, og í kvøld verður tað 215. ferð, at Føroyar vera partur av altjóða skrásettum landsdysti.

Hetta er áttanda ferðin, at Eysturríki er mótstøðuliðið, og hetta er triðja ferðin, at Eysturríki vitjar í Føroyum.

Fyrsta ferðin var fyri 13 árum síðani, tá ið tað endaði 1-1. Ta ferðina legði Bogi Løkin, sum eftir hálvan tíma varð skiftur inn fyri skadda Jákup á Borg, Føroyar á odda tíðliga í seinna hálvleiki. Tveir minuttir seinni javnaði Eysturríki.

Onnur ferðin var fyri átta árum síðani, tá ið Eysturríki vann 3-0.

28. mars í ár endaði tað 3-1, tá ið Føroyar vóru í Wien. Tá var tað Sonni Ragnar Nattestad, sum í 19. minutti skoraði og birti Landskrona vónir millum føroyingar.

Eysturríki

1 12. 09.1990     Føroyar – Eysturríki          1-0 EM

2 22.05.1991      Eysturríki – Føroyar         3-0 EM

3 11.10.2008      Føroyar – Eysturríki          1-1 HM

4 05.09.2009      Eysturríki – Føroyar         3-1 HM

5 22.03.2013      Eysturríki – Føroyar         6-0 HM

6 15.10.2013      Føroyar – Eysturríki          0-3 HM

7 28.03.2021      Eysturríki – Føroyar         3-1 HM

8 09.10.2021      Føroyar – Eysturríki