Fýra varafólk í Tórshavnar býráð í dag

Hóast bara eitt mál er á dagsskránni til býráðsfundin í Havn seinnapartin, málið um útstykking oman fyri Argjahamar, so skal býráðið sum fyrsta mál taka støðu til, at fýra varafólk taka sæti fyri býráðslimir, sum ikki fáa møtt.

Birgir Nielsen úr Fólkaflokkin fær ikki møtt og hevur biðið um, varafólk tekur sæti. Næstur á listanum hjá Fólkaflokkinum er Kristian Martin Skála, sum heldur ikki fær møtt. Tí verður tað annar varamaður á Fólkaflokslistanum, Bogi Andreasen, sum møtir fyri Birgir Nieslen.

Fólkaflokkurin hevur tveir býaráslimir.

Annfinn Brekkstein, einasti býráðslimur fyri Sambandsflokkin, fær heldur ikki møtt á býráðsfundinum í dag. Og tað fýra tey næstu á listanum heldur ikki, tí boð eru eftir fimta varafólkinum hjá Sambandsflokkinum, Jensiu Højgaard Kjærbæk, sum er nummar seks á listanum hjá Sambandsflokkinum.

Kristianna Winther Poulsen hjá Javnaðarflokkinum fær heldur ikki møtt, og fyri hana møtir Helena Dam á Neytstabø, sum saman við Biritu Baldvinsdóttir Iversen er næsta varafólk. Javnaðarflokkurin hevur seks býráðslimir í Havn.

Gunvør Balle úr Tjóðveldinum hevur eisini boð eftir varafólki. Fyri hana møtir næsta varafólk, sum er Turið Horn. Tjóðveldi hevur tríggjar býráðslimir í Havn.