Í kvøld var dystur millum liðini hjá Mariu P. Nólsoy, Horsens og Rakul S. Wardum, Ringkøbing í bestu donsku hondbóltsdeildini.
Í Forum høllini í Horsens vann heimaliðið 19-17 á Ringkøbing. Í steðginum var Horsens á odda 11-9.
Tað gekk ikki væl við málskjótingini hjá Mariu í kvøld. Hon skoraði eitt mál upp á fimm málroyndir. Mariu legði tó upp til eitt mál, og hon vann eisini liðnum eitt brotskast.
32 ára gamla, Stephanie Andersen stórspældi í málinum hjá Ringkøbing, og tí slapp Rakul tíverri ikki á vøllin í kvøld.
Horsens hevur tvey stig aftaná tveir teir fyrstu dystirnar. Ringkøbing hevur enn fyrsta stigið til góða hetta kappingarárið.
Fríggjadagin klokkan 17.30 møtast aftur tvey lið hjá tveimum føroyskum landsliðsleikarum. Súna K. Hansen og liðfelagarnir í Skanderborg taka tá móti liðnum hjá Pernillu Brandenborg, Keypmannahavn.
