Einki er liðugt, fyrrenn alt er liðugt. Soleiðis er støðan, nú fyrri dysturin millum sveisiska Lugano og NSÍ er liðugur á Lugano Arena, har tað í kvøld vóru 33 hitastig.
Seinni dysturin verður um eina viku í Klaksvík. Tá verður tað greitt, um leikluturin hjá NSÍ verður av á hesum sinni í Europa, ella um NSÍ fer at halda fram í UEFA Conference League.
Tá ið liðini hóskvøldið um eina viku fara á vøllin í Klaksvík verður setningurin hjá NSÍ nett tann sami, sum hann var fyri einari viku síðani, tá ið NSÍ var á útivølli í Slovenia ímóti FC Koper. Tá var útgangsstøðan tann, at FC Koper var frammanfyri við tveimum málum, tí slovenska liðið vann 2-0 í Klaksvík. NSÍ megnaði at reisa seg og eftir longdaleiktíð og brotssparkskapping at vinna seg víðari í kappingini.
Nú er møguleiki at endurtaka hetta bragdið, tá ið NSÍ um eina viku verður á heimavølli og við knívinum á barkanum fer at fáa stuðul frá heimaáskoðarunum.
Sveisiska Lugano legði seg á odda í 7. minutti, tá ið svenski álopsspælarin Elias Pihlström var málskjútti.
NSÍ var væl við og spældi seg fram til støður. Men tað var heimaliðið, ið sum tíðin leið trýsti fyri at økja um leiðsluna og harvið at taka spenningin burtur undan ferðini til Føroya. Tað eydnaðist tíggju minuttir undan leikloki at økja um leiðsluna til 2-0. Málskjútti var týski liðformaðurin og álopsspælarin Kevin Behrens.
Lugano var síðstu minuttirnar støðugt í álopi, og NSÍ vísti fínan hugburð og stríddist fyri lívinum og møguleikanum at taka tað mista aftur á heimavølli. At tað eydnaðist at halda heimaliðnum frá at skora fleiri mál komst fyrst og fremst av, at Tom Amos aftur í kvøld var sannur brandur millum NSÍ stólparnar.
Í kvøld var saknur í liðformanninum Peturi Knudsen, sum var leikbannaður, og so kom tað illa við, at Meinhard E. Olsen ikki var tøkur, eftir at hann mánakvøldið fór skaddur av vøllinum longu í fyrra hálvleiki, tá ið NSÍ í Gundadali spældi ímóti HB.
Einki er liðugt, fyrrenn alt er liðugt. Nú fer NSÍ at flyta fokus á grannauppgerðina á heimavølli ímóti Skála, sum er flutt til mánakvøldið klokkan 19. Og so verður takið í Klaksvík at reisa seg, sum NSÍ fyri einari viku síðani gjørdi í Slovenia.
