Oleksiy Danilov, sum er skrivari hjá ukrainska trygdar-og verjuráðnum, sigur við Sky News, at Ukraina fyrireikar seg til, at Russland fer at víðka um kríggið tær næstu vikurnar.
- Russar fyrireika seg til at víðka um kríggið. Teir savna alt, sum teir hava og hava hernaðarvenjingar.
Hann útilokar ikki, at Russland kann leggja ætlanir um at leypa á Ukraina bæði har norðuri, suðuri og eysturi í landinum - júst, sum teir gjørdu, tá innrásin byrjaði hin 24. februar í fjør.
Oleksiy Danilov heldur tað ikki vera óhugsandi, at hetta verður gjørt í samband við ársdagin fyri krígnum.
- Vit útiloka einki tær næstu tvær til tríggjar vikurnar, sigur hann.
Skrivarin hjá ukrainska trygdar-og verjuráðnum væntar, at russar fara at leypa á við 160.000 herfólkum, sum verða partur av seinnu bylgjuni av innrásini.
Samstundis heitir hann á sameind lond í vesturheiminum um at senda enn fleiri vápn til Ukraina.
- Tað eru blóðugir dagar í væntu, ávarar ukrainski skrivarin, sum leggur aftrat, at næstu tveir til tríggir mánaðirnir fara at gerast avgerandi fyri kríggið.
