Tað endaði við 1-0 sigri til gestirnar, tá ið HB í dag vitjaði við Margáir. Sigursmálið skoraði miðvallarin Heini F. Sørensen við brotssparki, tá ið smáir 20 minuttir vóru farnir. Hetta var áttanda ferðin í ár, at Heini F. Sørensen var málskjútti í Meistaradeildini, og tað er merkisvert, at 22 ára gamli Heini F. Sørensen er toppskjútti hjá HB.
Eftir 3-0 heimatap ímóti KÍ fyri einari viku síðani, var ein partur av søguni, at nú var HB í vanda fyri at missa europeiska atgongumerki. Í dag er tað ein partur av søguni, at HB tvey umfør undan kappingarenda so at siga hevur tryggjað sær pláss í Europa.
HB er á triðja plássi við 44 stigum. Tað eru fimm stig og betri málmunur aftur til B36, ið kappast vð grannarnar um europeiska atgongumerki. Sunnudagin fer HB at spæla á útivølli ímóti NSÍ, sum kann tryggja sær FM heitið, og í síðsta umfari verður tað grannadystur í Gundadali. Sunnudagin fær B36 vitjan av KÍ.
Í dag var tað merkisvert, at Tróndur Sjúrðarson vardi HB málið fyri fyrstu ferð í Meistaradeildini. Hetta var sambært FaroeSoccer áttanda ferðin, at 18 ára gamli Tróndur Sjúrðarson var málverji í Meistaradeildini. Í fjør vardi hann málið hjá FC Suðuroy í sjey dystum.
Tað er framvegis møguleiki hjá HB at vinna silvurkrónurnar. HB hevur 44 stig, og KÍ, sum í síðsta umfari fær vitjan av Víkingi, hevur 48 stig.
Hóast EB/Streymur er á sætta plássi, so sigur støðutalvan, at EB/Streymur framvegis er í vanda fyri at flyta niður. EB/Streymur hevur 26 stig, AB og Skála ÍF hava 24 stig, 07 Vestur hevur 22 stig, og B68 hevur 20 stig.
Í tveimum teimum síðstu umførunum vera mótstøðuliðini hjá EB/Streymi Víkingur á útivølli og Skála ÍF á heimavølli.
