Leygardagin hin 29. august verður aftur lív og festivalstemningur á Viðareiði, tá Norð Festivalurin 2026 fer av bakkastokki. Øll nøvnini eru nú klár, og atgongumerkjasølan gongur strúkandi.
- Vit gleða okkum ótrúliga nógv til aftur at fylla Viðareiði við tónleiki, lívi og góðum festivalhýri. Áhugin hevur verið sera góður, og nú øll nøvnini eru komin upp á pláss, gleða vit okkum bara enn meira til dagin og festivalstemningin, siga fyriskipararnir.
Størsta navnið í ár er danski rockbólkurin, D-A-D, og saman við teimum verður ein fjølbroytt røð av føroyskum nøvnum á pallinum.
- Á skránni eru D-A-D, Hallur Joensen við bólki, Eyðun Nolsøe, Terji Rasmussen & Kim Hansen, Herborg Torkilsdóttir, Finnur Koba & Páll Oddur Rubeksen, Rani Nolsøe, Marner av Lofti & Fríði Sigmundsson, Blátt Gras, Sámal Ravnsfjall, Bjarki Hansen, Rox við Signari í Homrum, Trøllapætur & Omman, DJ Skottar og DJ Cool.
Av Viðareiði verður sagt, at festivalvikuskiftið byrjar longu fríggjakvøldið hin 28. august við einari hugnaligari løtu á Hotel Norð.
- Leygardagin verður so lagt til brots frá morgunstundini við ókeypis morgunmati frá Kjølbro, og síðani verður tónleikur og undirhald allan dagin til langt út á náttina.
Á Norð Festivalinum verður eisini stórt barnaland, Silvi kemur á vitjan, og aftur í ár verður fletting á skránni. Hotel Norð og Grill Team syrgja fyri góðum mati til festivalgestirnar.
Føroya Tele-bussurin koyrir ókeypis úr Klaksvík til Viðareiðis hvønn hálvan tíma allan dagin og náttina, og um 04-tíðina koyrir náttarbussur beinleiðis av Viðareiði til Havnar.
– Vit vilja, at Norð Festivalurin skal vera ein hugnaligur dagur fyri alla familjuna, har fólk kunnu njóta góðan tónleik, góðan mat og serstaka festivalhýrin á Viðareiði. Vit vóna at síggja nógv fólk aftur í ár, siga fyriskipararnir.
Atgongumerki fáast til keyps á www.atgongumerki.fo
