Føroyingaliðini í bestu mansdeildini í hondbólti vunnu einki stig í kvøld, tá tey leiktu fyrsta umfarið í kappingini.
Vilhelm Poulsen og liðfelagarnir í Lemvig-Thyborøn taptu 30-33 fyri Sønderjyske á útivølli. Í steðginum var heimaliðið á odda 15-14.
Persónliga gekk tó framúr væl hjá Vilhelmi Poulsen, ið gjørdist toppskjútti hjá Lemvig-Thyborøn við átta málum uppá níggju skotroyndir.
Hákun West av Teigum skoraði trý mál uppá seks skotroyndir, tá hann og liðfelagarnir í Skanderborg Århus taptu 22-24 fyri Fredericia á útivølli. Í steðginum var Fredericia á odda 10-9.
Í øðrum umfarinum 7. september tekur Lemvig-Thyborøn móti Fredericia á heimavølli. Sama kvøld spælir Skanderborg Århus móti Ålborg, ið hevur Mikkel Hansen á liðnum.
