100 milliónir krónur eru settar av til P/F Suðuroyartunnil í uppskotinum til fíggjarlóg fyri 2027, sum varð lagt fyri Løgtingið í gjár.

Tað er sama upphædd sum í 2025 og 2026, og í fíggjarlógaruppskotinum eru eisini 100 milliónir krónur árliga lagdar inn í ætlanina fyri 2028 og 2029.

Talan er um partapening í P/F Suðuroyartunnli. Fíggingarleisturin, sum politiska skipanin hevur arbeitt við, byggir á, at landið setur 100 milliónir krónur árliga í felagið í tíggju ár – tilsamans eina milliard krónur. Harumframt er ætlanin, at Íleggingargrunnurin skal veita 350 milliónir krónur.

Fyrst útboð – síðani avgerð um bygging

Hóast 100 milliónir krónur verða settar av næsta ár, er endalig politisk avgerð enn ikki tikin um at byggja Suðuroyartunnilin.

Forkanningarnar eru nú so gott sum lidnar. Í februar í ár samtykti Løgtingið lógina, sum gevur P/F Suðuroyartunnli heimild at fyrireika, projektera og bjóða Suðuroyartunnilin og tilhoyrandi tunnils- og vegakervi út.

Tá verkætlanin hevur verið í útboði, fæst ein neyvari kostnaðarmeting.

Er politisk undirtøka tá fyri at fara undir sjálva byggingina, er ætlanin at leggja eitt nýtt lógaruppskot fyri Løgtingið, sum gevur tunnilsfelagnum heimild at byggja og reka tunnilin.

Tí er 100 millióna játtanin í 2027 partur av fyrireikingini og kapitaliseringini av tunnilsfelagnum – og ikki í sjálvum sær ein byggijáttan til Suðuroyartunnilin.

Verkætlanin mett til 4,9 milliardir

Í álitinum hjá Fíggjarnevndini frá í summar varð samlaða verkætlanin mett at kosta umleið 4,875 milliardir krónur.

Av hesum varð sjálvur Suðuroyartunnilin við íbinding til Skúvoy mettur til 4,125 milliardir krónur. Atknýttar verkætlanir – millum annað vegagerð, nýggjur Sandvíkartunnil og tunnil gjøgnum Traðarhamar – vóru mettar til 750 milliónir krónur.

Endaligi kostnaðurin verður tó ikki kendur, fyrr enn verkætlanin hevur verið í útboði.

Síðani 2020 eru góðar 29 milliónir krónur brúktar til forkanningar og fyrireikingar av Suðuroyartunlinum. Tann gamla játtanin til forkanningar fær ongan nýggjan pening í 2027, tí arbeiðið nú verður framt í P/F Suðuroyartunnli.