Almenna byggisamtyktin fyri Klaksvíkar kommunu er nú endurskoðað og góðkend.

Vísandi til grein 7 í býarskipanarlógini, sendi Klaksvíkar kommuna hin 30.oktober í fjør Umhvørvismálaráðnum (nú heilsu- og orkumálaráðið) uppskot til endurskoðan av byggisamtyktini fyri Klaksvíkar kommunu til góðkenningar.

Uppskotið lá frammi til viðmerkingar frá 10. juni – 1. juli 2025, og seinasta freist at kæra og viðmerkja uppskotið var 22. juli 2025. Inn kom eitt broytingaruppskot, ið verður viðgjørt sum eitt sjálvstøðugt mál.

- Høvuðsendamálið við endurskoðanini av byggisamtyktini er at dagføra almennu ásetingarnar í byggisamtyktini, so tær eru í samljóði við bygningskunngerðina (BK17), tí ávísingar og loysnir í kunngerðini eru meira viðkomandi og tíðarhóskandi í dag.

Somuleiðis eru nýggjar ásetingar lagdar aftrat almenna ásetignartekstinum, t.d. girðing, lýsing av vegaøki, heimildir viðvíkjandi nýtslu av fríøkjum og grundøkjavídd í samband við útstykkingar og annað.

- Meginparturin av økisásetingunum (økispørtunum) í kommununi eru endurskoðaðir, har reguleringar eru gjørdar í einum størri høpi, t.d. dagføring í mun til BK17, tilvísingar og kort, fjølbroyttar bústaðarloysnir, smærri búeindir og greiðari nýtslulýsing.

Í Klaksvíkar kommunu verður víst á, at onkrar reguleringar eru gjørdar í lendisskipanunum (økispørtunum), millum annað er eitt nýtt øki við ásetingini F3 – frítíðar- og ferðavinnuøki lagt út á Trøllanesi, og nýggir økispartar A34 til frama fyri einum komandi elradepli Úti í Grøv.

- Býarskipanarnevnd Landsins hevur havt málið til viðgerðar og hevur viðmælt ráðnum at góðkenna endurskoðaðu byggisamtyktina fyri Klaksvíkar kommunu. Heilsu- og orkumálaráðið tekur somuleiðis undir við viðmælinum frá býarskipanarnevndini og hevur við heimild í grein 4 í býarskipanarlógini góðkent endurskoðaðu byggisamtyktina fyri Klaksvíkar kommunu.

Meira um hetta kann lesast á www.klaksvik.fo