Ovi Lützen, Pauli Høj og liðfelagarnir í Bergsøy kunnu stórfegnast. Aftaná fimm bummtúrar eydnaðist í sætta dystinum í fyrsta kappingarárinum nakrantíð í bestu norsku hondbóltsdeildini at knógva fyrsta sigurin, og harvið fáa fyrstu stigini. Talan er sostatt um ein søguligan sigur hjá Bergsøy.

Bergsøy vann á útivølli ein góðan 34-28 sigur á Sandnes. Tað gekk framúr hjá Bergsøy í fyrra hálvleiki, og vóru Ovi, Pauli og liðfelagarnir á odda 19-12 í steðginum.

Pauli skoraði trý mál upp á fýra málroyndir. Ovi skoraði eitt mál, men legði upp til fimm mál.

Bergsøy er næstaftast í deildini við tveimum stigum. Sandnes er aftast við ongum stigi.

Liðið sum endar aftast aftaná lokna kapping flytur beinleiðis niður í næstbestu deildina. Liðini sum enda næst- og triðaftast spæla upp- og niðurflytingardystir móti næst- og triðovasta liðnum í næstbestu deildini um rættin at spæla í bestu deildini.

Komandi sunnudag klokkan 17 spælir Bergsøy fjórðingsfinalu í steypakappingini á heimavølli. Dysturin verður móti Bergen.