Verandi greipuvinnarar, H71 vunnu í dag fimta sigurin á rað.

Á útivølli í høllini á Hálsi Norður vann H71 34-32 á Neistanum. Í steðginum vóru hoyvíkingar á odda 17-16.

Tómas de San Roque Singes og Kristian Jensen vóru við seks málum hvør toppskjúttar hjá Neistanum.

Boas Ellefsen á Skipagøtu var við 14 málum aftur stórskjútti hjá H71 í dag.

Í høllini á Skála tryggjaði Team Klaksvík sær fyrsta sigurin og fyrstu stigini við 26-23 sigri á StÍF. Í fyrra hálvleiki lá sera væl fyri hjá klaksvíkingum, ið vóru á odda 16-9 í steðginum.

Pætur Ó. Barclay og Pætur Johansen vóru við seks málum hvør toppskjúttar hjá StÍF. Páll Müller var við 10 málum toppskjútti hjá Team Klaksvík. Løgmaður, Beinir Johannesen skoraði tvey mál fyri Team Klaksvík. Tað er neyvan sæð fyrr, at ein virkandi løgmaður skorar mál í bestu deildini.

Í høllini í Vestmanna vann VÍF stórsigur 41-29 á EB. Í steðginum vóru vestmenningar á odda 22-17.

Djóni Bárðarson Nielsen, Hallur Arason og Filip Jojic vóru við seks málum hvør toppskjúttar hjá VÍF. Silas Larsen var við 11 málum toppskjútti hjá EB.

H71 er fremst við 10 stigum fyri fimm dystir. VÍF hevur átta stig og Neistin hevur seks stig. Kyndil, KÍF og EB hava fýra stig hvør. Team Klaksvík hevur tvey stig, meðan StÍF hevur enn fyrsta stigið til góðar.

HER ber til frá HSF at síggja dómaraseðlarnar frá dagsins dystum í Burn Mansdeildini: