Ísraelska fótbóltslandsliðið fer at bera svørt syrgibond í Nations League-dystinum móti Írlandi í kvøld.

Tað upplýsir ísraelska fótbóltssambandið sambært tíðindastovuni AFP.

Syrgibondini skulu minnast ofrini fyri álopið hjá Hamas á Ísrael 7. oktober 2023. Sambært ísraelska fótbóltssambandinum hevur evropeiska fótbóltssambandið, UEFA, góðkent umbønina.

Írland og Ísrael møttust eisini fyri einari viku síðani í fyrsta dystinum í bólkaspælinum. Tá bóru írsku spælararnir svørt armbond í mótmæli móti krígnum í Gazageiranum.

Dysturin varð spældur í Ungarn. Undir ísraelska tjóðsanginum boygdu írsku spælararnir høvdið, og liðskipararnir tóku ikki lógvatak undan dystinum.

Returdysturin verður spældur í serbiska býnum Backa Topola. Írska fótbóltssambandið hevur av trygdarávum noktað at hýsa dystinum á heimavølli.

Hamas leyp á Ísrael fyri sløkum trimum árum síðani. Sambært AFP kostaði álopið 1.221 fólkum lívið.

Ísrael svaraði við einum umfatandi hernaðarálopi, sum hevur lagt meginpartin av Gazageiranum í oyði. Sambært heilsumálaráðnum í Gaza hava fleiri enn 74.200 fólk latið lív.

Dystirnir móti Ísrael hava elvt til nógv kjak í Írlandi, sum leingi hevur stuðlað palestinska málinum.

Írland vann fyrra dystin 3-0 eftir eina óróliga upptakt. Írsku spælararnir atkvøddu fyri at spæla dystin, eftir at málverjin Gavin Bazunu tók seg úr hópinum dagin fyri.

Í gjár varð tíðindafundurin hjá Írlandi avbrotin, eftir at ísraelskir journalistar settu landsliðsvenjaranum Heimir Hallgrimsson spurningar. Teir spurdu millum annað um hansara støðu til eitt álop á eitt flogfar á veg til Ísraels fyrr í vikuni.

Dysturin í kvøld byrjar klokkan 19.45 føroyska tíð.

/Ritzau/AFP