Hin 1. oktober fylti dagstovnurin Miðgarður 15 ár. Føðingardagurin hevur verið hátíðarhildin alla vikuna við ymiskum tiltøkum fyri børnunum, foreldrum og starvsfólki.
- Føðingardagsvikan byrjaði mánadagin við vatnkríggi, spæli og sápubløðrum úti, og pylsuvognurin kom á vitjan. Týsdagin var hoppiborg og andlitsmáling. Mikudagin var djórapostarenning í garðinum og stóladansur, og Raska frá MBM var eisini í føðingardag og hevði okkurt gott við til børnini at drekka.
Í Vága kommunu vísa tey á, at á sjálvum føðingardegnum var sjónleikur, og seinnapartin henda dagin vóru foreldrini boðin til kaffi og lagkøku.
Føðingardagsvikan endaði við hugna og felags morgunmati, og síðan vóru øll børnini úti og runnu í góðveðrinum, sum var henda dagin.
- Miðgarður er ein stórur og fjølbroyttur dagstovnur mitt í Miðvági. Stovnurin hevur vøggustovur, barnagarðsstovur, eina stovu til seks ára gomul og eina serstovu, sum fevnir um alt dagstovnaøkið í Vága kommunu.
Í Vága kommunu verður víst á, at fjøll, fjøra, viðarlund og áir eru nærmastu grannar hjá Miðgarði, og náttúran er ein virkin partur av gerandisdegnum á stovninum.
- Miðgarður hevur fingið virðisløn fyri arbeiðið við endurnýtslu, klædnaendurnýtslu og náttúruvirksemi.
Í Vága kommunu ynskja tey børnum, foreldrum og starvsfólkum í Miðgarði hjartaliga tillukku við 15 árunum og takkað verður fyri alt tað góða arbeiðið, sum verður gjørt á stovninum hvønn dag.
