Ulf Kristersson forsætisráðharri hevur longu avtalað fund mánadagin um samráðingarnar eftir valið.

Borgarligu flokkarnir í Svøríki eru bjartskygdir, eftir at veljarakanningar vísa, at teir hava minkað um munin upp til reyðgrøna blokkin beint undan ríkisdagsvalinum sunnudagin.

Fríggjakvøldið komu teir saman til seinasta sjónvarpskjakið hjá SVT undan valinum.

– Blágula come-back'ið er veruleiki, sigur Ebba Busch, forkvinna í Kristdemokraterna.

Leingi hevur sæð út til, at borgarligu flokkarnir fóru at tapa valið greitt. Men seinastu veljarakanningarnar hava aftur skapt spenning um, hvør fer at standa sterkast eftir valið.

Spurningurin er, um Ulf Kristersson kann halda fram sum forsætisráðharri, ella um Magdalena Andersson, forkvinna í Javnaðarflokkinum, fer at hava bestu kortini á hondini.

Í fleiri kanningum minkar borgarligi blokkurin um munin upp til tann reyðgrøna, og í einari standa blokkarnir á jøvnum.

Ulf Kristersson, sum eisini er formaður í Moderaterna, sigur seg longu vera til reiðar til samráðingarnar eftir valið.

– Vit hava longu avtalað ein fund mánadagin fyri at leggja til rættis alt tað, sum kemur eftir valið, og seta gongd á tær samráðingar, sum eru neyðugar, sigur hann.

/Ritzau/TT