Aftaná tvey tap í tveimum teimum fyrstu dystunum í kappingini, so brast í kvøld fyri nev hjá Róa Ellefsen á Skipagøtu og liðfeløgunum í Aarhus í næstbestu donsku hondbóltsdeildini.
Aarhus vann á heimavølli í Skæring-høllini 29-26 á Lemvig-Thyborøn. Í steðginum var Aarhus á odda 14-12.
Tað gekk framúr hjá Róa, ið var toppskjútti hjá Aarhus við átta málum.
Í morgin klokkan 13 verður føroyingauppgerð, tá Rúnar Hammer og liðfelagarnir í Stoholm taka ímóti Kjartani Johansen og hansara liðfeløgum í Vendsyssel. Klokkan 13 spæla eisini Julian J. Kragesteen og liðfelagarnir í Køge dyst á útivølli móti AGF.
