Gongur sum ætlað, so kemur frákoyrdi katalonski forsetin, Carles Puigdemont, til Føroya einaferð í vár. Tað sigur Magni Arge, fólkatingsmaður, sum hevur boðið katalonska loysingarleiðaranum higar – Vit ætla at fáa vitjanina í lag fyri páskir. Men tað veldst sjálvandi um støðuna í Katalonia, og hvussu tað verður við at skipa nýggja stýrið har, sigur Magni Arge. Í Katalonia skulu tey velja nýggjan forseta, og meðan Carles Puidgemont vitjaði á Universitetinum í Keypmannahavn í gjár komu boðini um, at hann varð tilnevndur sum valevni til forsetaembætið. – So vit mugu fáa at síggja, hvussu tað passar í kalendaran hjá honum – og vita, um hann kemur sum privatpersónur, ella hann kemur sum stjórnarleiðari í Katalonia, sigur Magni Arge. Carles Puidgemont hevði sjálvur valt at vitja Danmark, men tað var Magni Arge, sum hevði boðið honum inn á Christiansborg at hitta danskar politikarar. – Eg hevði so eisini hjálpt honum við nøkrum praktiskum viðurskiftum, sigur Magni Arge. Carles Puigdemont hevur verið rættiliga umstríddur persónur seinastu mánaðirnar, síðani fólkaatkvøðuna í Katalonia, sum spanska stjórnin segði vera ólógliga – og ikki minst síðani hann varð koyrdur frá, fór í útlegd og nú sum afturvaldur í katalonska tjóðartingið. Av tí at hann vitjaði sum privatpersónur í Danmark og ikki sum umboð fyri spanskar myndugleikar, so hevði hann sum so ikki trygdarvørðar við sær til Danmarkar, men hann hevði tó fólk rundan um seg. – Teir hava helst roknað hetta sum eina low-risc vitjan, men tað var skjótt, at donsk løgregla var rundan um hann, tí áhugin fyri honum var so ovurhondsstórur, greiðir Magni Arge frá. – Har vóru sera, sera nógv tíðindafólk runda um hann úr øllum møguligum londu – bæði úr Danmark, Spania, Katalonia, Norðurlondum, Frankaríki, Týsklandi, Bretlandi, Amerika og øðrum londum við, greiðir Magni Arge frá. Fólkatingsmaðurin sigur, at Carles Puigdemont er sera áhugaður í at koma til Føroya. Hann kennir til føroysk viðurskifti – og tað er ikki bara tí, at hann er politikari, men frá síni tíð sum journalistur. – Hann veit útmerkað væl um arbeiði okkara við eini stjórnarskipan, og kennir væl ta skipan, sum er millum Føroyar og Danmark í dag, sigur Magni Arge, sum leggur afturat, at tað gera so nógv, sum fáast við politikk í hasum økjunum, sigur hann. Magni Arge øtast um fólkaræðisligur viðurskiftini í Spania. – Har eru tey komin til ta støðu, at tú verður settur í fongsul fyri at røkja tíni politisku áhugamál. Tað er púra óskilandi í okkara verð. Tí hava okkara viðurskifti sjálvandi áhuga millum politikarar har, sigur Magni Arge. – Og eg skilji slett ikki danskar politikarar, sum bara vilja stilla seg aftan fyri Rajo. Hví kunnu teir ikki stíga fram og siga teimum, hvussu tey í Danmark greiða hesa viðurskifti, spyr Magni Arge.