Tað vóru 18 tingfólk, sum atkvøddu fyri at taka lógaruppskotið úr Rættarnevndini, hóast einki álit er skrivað.
Nevndin hevur fingið longda freist at skriva álit, men hon var eisini farin, tá Hervør Pálsdóttir setti fram uppskot um at fáa málið úr nevndini til aðru viðgerð í Løgtinginum, uttan at álit var skrivað.
15 tingfólk atkvøddu ímóti at taka málið úr nevndini.
Orðaskiftið í Løgtinginum bendir á, at býtið millum tingfólkini í mun til sjálvt lógaruppskotið kann verða á leið tað sama.
Í fimm av teimum sjey flokkunum var semja um atkvøðugreiðsluna. Í Javnaðarflokkinum, Tjóðveldi og Framsókn var semja um at fáa málið aftur í tingið.
Í Miðflokkinum og Sjálvstýri var semja um, at málið ikki skuldi takast úr nevndini, meðan tvey tingfólk í hvørjum av flokkunum Sambandsflokkinum og Fólkaflokkinum atkvøddu fyri. Ávikavist fimm og sjey tingfólk í hesum flokkunum atkvøddu ímóti.
Hetta merkir ikki, at úrslitið verður tað sama, tá Løgtingið seinni í dag fer at atkvøða um sjálvt lógaruppskotið. Men fleiri ábendingar eru um, at atkvøðugreiðslan fer at líkjast teirri fyrru.
Fellur málið við aðru viðgerð, er tað endaliga avgreitt í Løgtinginum.
Fleiri tingfólk hava tó víst á, at málið ikki steðgar av teirri orsøk. Tey hava undir orðaskiftinum sagt, at uppskot um broytingar í fosturtøkulógini fer at verða lagt fyri Løgtingið aftur seinni.
