Tað hevur elvt til ónøgd í grønlendsku fiskivinnuni, at felagið SiKu Trawl hevur fingið tillutað stórar kvotur til havgangandi fiskiskap.

Felagið fekk 18. august tillutað 2.468,5 tons av svartkalva, 1.950 tons av toski og 166,6 tons av kalva.

Sambært Sermitsiaq mótmæla Halibut Greenland, Inua Fisheries Greenland og ein medeigari í Avalleq avgerðini.

Kritikkurin snýr seg serliga um, at landsstýrið hevur lagt dent á ætlanirnar hjá SiKu Trawl um at menna fiskivinnu og framleiðslu í Narsaq í Suðurgrønlandi.

Sambært mótmælunum var menning í einum ávísum øki ikki eitt krav í útboðnum. Feløgini halda tí, at umsóknirnar ikki eru viðgjørdar eftir frammanundan kunngjørdu treytunum.

Halibut Greenland og Inua Fisheries Greenland vilja hava kvoturnar bodnar út av nýggjum.

Landsstýrið hevur í grundgevingini víst á, at SiKu Trawl er eitt nýtt felag við nýggjum aktørum og ætlanum um at styrkja vinnumenningina í Suðurgrønlandi.

Tá Sermitsiaq skrivaði um málið, arbeiddi miðilin framvegis við at fáa Peter Borg, landsstýrismann í fiskivinnumálum, at svara atfinningunum.