Stjórnarflokkurin Sameint Russland stendur til ein greiðan sigur á russiska tjóðartingsvalinum.

Tá 20,82 prosent av protokollunum frá valstøðunum vóru tald upp í kvøld, hevði flokkurin fingið 57,07 prosent av atkvøðunum.

Tað vísa ávegisúrslit frá russisku miðvalnevndini.

Kommunistaflokkurin er næststørstur við 14,04 prosentum, meðan Liberaldemokratiski flokkurin, LDPR, hevur 9,31 prosent.

Fimm flokkar standa sambært fyrstu úrslitunum til at koma upp um fimm prosent sperrumarkið og fáa umboðan í Duma'ini.

Úrslitið hjá Sameindum Russlandi er higartil munandi betri enn vallstaðakanningarnar vístu. Ein vallstaðakanning frá VTsIOM gav flokkinum 49,4 prosent, meðan ein onnur kanning gav honum 52,8 prosent.

Fyrsta valið síðani innrásina

Hetta er fyrsta valið til russiska tjóðartingið, síðani Russland gjørdi fullskalaálop á Ukraina í februar 2022.

Vladimir Putin forseti hevur sjálvur lýst valið sum eina roynd av undirtøkuni fyri russisku hermonnunum og politikkinum hjá stjórnini.

Sameint Russland hevði eisini greiðan meiriluta undan valinum. Á valinum í 2021 fekk flokkurin 49,8 prosent av listaatkvøðunum og endaði við 324 av teimum 450 sessunum í Duma'ini.

Enn ber ikki til at siga, hvussu nógv tingfólk flokkurin fær hesaferð.

Orsøkin er, at bara helvtin av teimum 450 tingfólkunum verður vald eftir flokkslistum. Hin helvtin verður vald beinleiðis í einstøkum valdømum.

Avmarkað politisk mótstøða

Valið er farið fram undir politiskum umstøðum, har veruliga mótstøðan móti stjórnini hjá Putin er nógv avmarkað.

Flestu valevni, sum alment eru ímóti krígnum í Ukraina, sluppu ikki at stilla upp. Hinir stóru flokkarnir, sum eru við í valinum, hava eisini í stórum politiskum málum regluliga atkvøtt saman við Sameindum Russlandi.

Valið varð hildið í tríggjar dagar frá fríggjadegi til í dag.

Sambært russisku miðvalnevndini var valluttøkan 56,66 prosent.

Uppteljingin heldur fram í kvøld, og meira fullfíggjað úrslit verða væntað í morgin.

Kelda: Reuters/RBC