Sameint Russland, flokkurin sum stuðlar Vladimir Putin forseta, stendur til at fáa 49,4 prosent av atkvøðunum á russiska tjóðartingsvalinum.

Tað vísir ein exit-poll kanning frá russiska miðlinum IFX, sambært Reuters.

Russar hava atkvøtt í tríggjar dagar, og sunnudagur er seinasti valdagurin.

Talan er um fyrsta valið til Duma'ina, niðara kamarið í russiska tjóðartinginum, síðani Russland gjørdi fullskalaálop á Ukraina í februar 2022. Sameint Russland hevur frammanundan greiðan meiriluta og meira enn tveir triðingar av teimum 450 tingsessunum.

Putin hevur gjørt valið til roynd

Vladimir Putin er ikki sjálvur upp á val, men hann hevur lagt stóran politiskan týdning í úrslitið.

Undan valinum segði hann, at valið skuldi vísa, at milliónir av russum standa aftan fyri russisku hermenninar í Ukraina.

Reuters metir, at Kreml væntandi fer at brúka eitt gott úrslit hjá Sameindum Russlandi sum prógv um fólksliga undirtøku fyri politikkinum hjá Putin og krígnum í Ukraina.

Men møguleikarnir hjá russum at velja millum grundleggjandi ymiskar politiskar kósir hava verið avmarkaðir.

Flestu valevnini, sum alment eru ímóti krígnum, eru noktað at stilla upp. Hinir stóru flokkarnir, sum eru við í valinum, hava í týðandi málum regluliga atkvøtt saman við Sameindum Russlandi.

450 limir skulu veljast

Allir 450 limirnir í Duma'ini verða valdir fyri fimm ár.

Helvtin – 225 limir – verður vald eftir landsumfatandi flokkslistum. Hin helvtin verður vald beinleiðis í 225 einmansvaldømum.

Tí ber ikki beinleiðis til at umrokna tey 49,4 prosentini hjá Sameindum Russlandi til sama prosentpart av tingsessunum. Flokkurin kann fáa ein størri part av sessunum, alt eftir úrslitinum í teimum einstøku valdømunum.

Russiska valnevndin upplýsti í dag, at valluttøkan var komin upp móti 57 prosentum tíðliga um kvøldið. Fyrstu úrslitini verða kunngjørd í kvøld, meðan meira fullfíggjað úrslit verða væntað í morgin.

Kelda: Ritzau/Reuters