Vilt tú vera part­ur av nýggju fyri­byrg­ing­ar­eindini hjá Før­oya Politi?

Soleiðis spyr Føroya Politií tíðindaskrivi:

Føroya Politi styrk­ir nú tað krim­i­na­l­itets­fyr­i­byrg­jandi arbeiðið við at seta á stovn eina fyri­byrg­ing­ar­eind, og tí søkja vit eftir tveim­um starvsfeløgum. Av tí at tal­an er um eina nýggja eind, fært tú møguleika at vera við til at byggja víðari upp á verandi royndir, sam­stund­is sum vit skulu ganga nýggj­ar leiðir og menna nýggj hugskot.

Fyribyrgingareindin

Føroya Politi hevur í nógv ár ver­ið partur av einum væl­virk­andi toymi á SSP-øk­­inum (Skúli, Sosialir mynd­ug­leikar og Politi). Nú styrkja vit hetta arbeiðið við nýggju eindini og tveim­um starvsfólkum aft­urat. Eindin verður mannað av einum poli­ti­fak­lig­um leiðara, tveim­um politifakligum SSP-starvs­fólk­um og báð­um ný­stovn­aðu sivilu størvunum. Eind­in fer at arbeiða breitt við fyribyrging av brots­verk­um. 

Haraftrat verður eis­ini eitt ser­útbúgvið toymi sett á stovn, sum skal ar­beiða mið­víst við fyr­i­byrg­ing av trá­elting, harð­skapi í nær­sam­bond­um, ærutengdum málum og neyð­tøk­um (sonevnd SVÆV-mál). Arbeiðið við fyr­i­byrging av hesum slag­num av brotsverkum krev­ur servitan og førleikar inn­an sálarfrøði, sosial við­ur­skifti og ymiskar ment­an­ir. Starvsfólk á fyri­b­yrg­ing­areindini koma at a­rbeiða tætt saman við kann­ing­ardeildini og øðr­um starvsfeløgum hjá poli­t­inum.

Fyribyrgjandi arbeiði snýr seg eisini í stóran mun um beinleiðis sam­band við borgaran. Tí er tað týdningarmikið, at starvs­fólk á eindini megna at vísa umsorgan og tolsemi, tá tey vegleiða borgarar í trup­lum støðum ella við sam­an­settum avbjóðingum.

Starvsfólkini í fyri­byrg­ing­ar­eind­ini fara eisini at hava fyr­ilestrar, framløgur og undirvísing bæði fyri starvsfelagar og onnur. Tað er tí ein fyrimunur, um tú trívist væl í einum slíkum leikluti og ert sinnað/ur at miðla tína vitan til onnur.

Um starvið

Sum starvsfólk í fyri­byrg­ing­ar­eindini skalt tú fyrst kunna teg um a­r­beiðs­gongd­ir­nar hjá politinum og síð­ani brúka tínar fakligu før­leikar til fyribyrgjandi ar­beiði. Tú skalt skilja sam­an­settar málsgongdir og sosi­al viðurskifti, og duga at ar­beiða greinandi út frá dátum. Harumframt er tað avgerandi fyri at eydn­ast væl í starvinum, at tú hevur hug og vilja til at skapa góð sambond við aðrar fakbólkar í polit­i­num, við uttanhýsis sams­tarvs­fel­agar og ikki minst við borg­arar.

Í byrjanini verða dagligu ar­beiðs­uppgávurnar mill­um annað:

• Rakstraruppgávur í sam­­bandi við gjøgn­um­gongd, meting og upp­fylg­ing av málum

• At leggja til rættis og fremja miðvísar og til­lag­aðar eftir- og víð­ar­i­út­búgv­ingar fyri starvsfelagar hjá Før­oya Politi innan SVÆV-mál, traumuvitan og traum­utilvitað ar­beiðs­lag, avhoyringar- og kann­ing­arhættir, galdandi lóggávur innan viðkomandi málsøki

• At stuðla starvsfeløgum við denti á fyribyrging

• At taka lut í ymiskum menn­ingarverkætlanum, eitt nú við at styrkja fak­liga vitanarstøðið innan við­komandi málsøki

• At vera við til at styrkja sam­starvið tvørturum deild­ir og fakøkir millum politi, aðrar myndugleikar og viðkomandi hjálpa­r­fel­ag­s­skapir

• At samstarva og luttaka í net­verk­inum innan fyri­byrg­ing­ar­økið hjá øllum poli­tinum

Tín fakligi profilur

Vit søkja eftir tær, sum:

• hevur útbúgving og/ella fakliga bakgrund innan sálarfrøði, sosial viðurskifti ella líknandi

•  hevur fakliga vitan um SVÆV-mál

• hevur royndir við at skapa sambond

• hevur góðar miðl­a­før­lei­k­ar, bæði munnliga og skrivliga

• hevur hug og vilja til at und­ir­vísa

• hevur førleika til at stuðla starvsfeløgum í sam­an­settum málum

• megnar at ráðgeva og eggja bæði órættaðum og brots­fólkum til at taka ímóti neyðugu hjálpini

• dugir at hugsa tvørt­ur­um deildir og fakøkir á stovn­inum

• hevur førleikar til og á­huga fyri at arbeiða við menn­ing og nýhugsan í ein­um samansettum stovni

Kunnleiki til føroyska sam­felagið og føroyska mál­ið er ein fyrimunur, tó ikki eitt krav. Dugir tú ikki før­oyskt, verður málslig und­ir­vísing veitt. Starvið hev­ur við sær viðkomandi eftir- og víðariútbúgving á Poli­ti­skúl­anum í Vejle.

Fyribyrgingareindin held­­ur til í Tórshavn, men tú mást rokna við eini á­vísari mongd av ferðing kring Føroyar í sambandi við fyribyrgjandi arbeiðið.

Arbeiðstíðin er 37 tímar um vikuna.Trygd­ar­góð­kenn­ing er ein treyt fyri starvi. Tú skalt eisini kunna halda kravdu trygd­ar­góð­kenn­ing­ina alt tíðarskeiðið, tú ert í starvi hjá politinum, skrivar Føroya Politi