Tað er stór frøi í týska flokkinum Alternative für Deutschland, AfD, í kvøld.
Ein vallstaðakanning hjá almenna týska kringvarpinum ARD vísir, at AfD stendur til at fáa 37 prosent av atkvøðunum á deilstatsvalinum í Mecklenburg-Vorpommern og harvið gerast størsti flokkur.
– Hetta er eitt fantastiskt kvøld fyri Alternative für Deutschland, sigur Leif-Erik Holm, sum er valevni floksins til sessin sum stjórnarleiðari í deilstatinum, sambært týsku tíðindastovuni dpa.
SPD hjá sitandi stjórnarleiðaranum Manuela Schwesig stendur sambært vallstaðakanningini til 35,5 prosent – hálvtannað prosentstig aftan fyri AfD.
Leif-Erik Holm sigur, at AfD nú fer at bjóða øllum flokkum til samráðingar um at skipa stjórn í Mecklenburg-Vorpommern.
Hinir flokkarnir siga nei
Tað kann kortini gerast trupult hjá AfD at sleppa til valdið.
Hinir stóru týsku flokkarnir hava higartil noktað at skipa stjórn saman við AfD. Hetta verður í týskum politikki rópt Brandmauer – ein politiskur brandveggur, sum skal halda AfD uttan fyri stjórnarsamstarv.
Tí er tað ikki vist, at AfD fær stjórnarleiðaran, hóast flokkurin verður størstur.
AfD hevur millum annað ført valstríð fyri strangari útlendingapolitikki og fyri at endurreisa tættari orku- og onnur sambond við Russland. Flokkurin hevur serliga havt undanvind í eysturtýsku deilstatunum.
Vanlukkuval hjá flokkinum hjá Merz
Valið sær samstundis út til at gerast søguliga vánaligt hjá CDU hjá týska samveldiskanslaranum Friedrich Merz.
CDU stendur bert til 5,5 prosent og er sostatt beint oman fyri fimm prosent markið fyri at fáa umboð í deilstatstinginum.
Verður hetta endaliga úrslitið, er tað vánaligasta úrslitið hjá CDU á einum týskum deilstatsvali síðani 1949. Merz kallaði sjálvur úrslitið eina „vanlukku“, tá vallstaðakanningarnar komu.
AfD vann eisini deilstatsvalið í Sachsen-Anhalt fyrr í september. Gongdin í eysturtýsku deilstatunum hevur tí økt trýstið á stjórnina hjá Friedrich Merz.
