Hvussu kunnu Føroyar og onnur smá norðurlendsk samfeløg fyrireika seg til álvarsligar hendingar, sum standast av veðurlagnum? Tað skal ein verkætlan, sum NORA hevur boðið út á Keypsportali landsins, kanna.
Verkætlanin fevnir um Føroyar, Grønland, Áland, Ísland og Bornholm. Uppgávan er at kanna, hvørjar hendingar kunnu raka hesi samfeløg, og hvussu tey kunnu bera seg at, eisini í ringasta føri. Úr arbeiðinum skulu koma ítøkiligar tilbúgvingarætlanir og tilmæli, sum kunnu brúkast, tá ein kreppa tekur seg upp.
Ein partur av uppgávuni er at lýsa, hvussu sjálvboðin kunnu skipast og takast við í tilbúgvingararbeiðið. Verkætlanin skal eisini geva teimum fimm samfeløgunum høvi at læra av royndunum hjá hvørjum øðrum.
Søkjast kann um upp í 800.000 krónur til verkætlanina. Tilboð skulu latast inn í seinasta lagi 7. desember klokkan 14. Sambært útboðnum verður vinnarin kunngjørdur 18. desember.
