- Hvussu eru føroysku firðirnir broyttir, og eru broytingar farnar fram í Vestmanna?
Hetta er líkasum yvirskriftin á einum áhugaverdum tiltaki, sum verður í Spælhúsinum á bedingini í Vestmanna í kvøld.
- Endamálið er at hoyra vestmenningar - hvussu teir hava upplivað, at fjørðurin og sundið eru broytt gjøgnum árini.
Tað er granskingarverkætlanin EcoFar, sum skipar fyri.
- Verkætlanin savnar og greinar bæði søguligar og nýggjar vísindaligar dátur og sameinir tær við staðbundna vitan.
Á heimasíðuni hjá Vestmanna kommunu verður víst á, at endamálið við verkætlanini er at fáa eina betri heildarmynd av, hvussu føroysku firðirnir hava broytt seg yvir tíð.
- Í hesum sambandi vilja fólkini aftan fyri verkætlanina fegin hoyra frá vestmenningum, sum hava royndir og kenna víkina, fjørðin og sundið í Vestmanna, verður lagt aftrat.
EcoFar er ein samstarvsverkætlan millum Umhvørvisstovuna, Havstovuna, Fróðskaparsetur Føroya, Tjóðsavnið og Firum.
- Tiltakið byrjar klokkan 19, og øll eru vælkomin, verður sagt í Vestmanna.
