Føroyskur tónleikur fekk eina sera góða móttøku á altjóða tónleikafestivalinum Iceland Airwaves í Reykjavík um vikuskiftið.
Fríggjakvøldið 6. november var konsertstaðið Iðnó karmur um eina serliga føroyska konsertskrá, har Sakaris, Tunghoyrt, RSP og Janus Rasmussen spældu hvør sína konsert.
Og sambært íslendsku miðlunum eydnaðist føroyingunum væl at fáa áhoyrararnar við sær.
Morgunblaðið skrivar, at føroyingarnir tóku yvir Iðnó, har nógv fólk vóru komin saman at hoyra føroyska tónleikin.
Tunghoyrt fekk gólvið at rista
Sakaris var fyrstur á pallinum við sínum elektroniska popptónleiki.
The Reykjavík Grapevine lýsir framførsluna sum eina lívliga og stuttliga konsert, har sjey tónleikarar skaptu eina veitslukenda løtu við elektroniskum poppi, gittarum og ljómborðum.
Síðani fór ungi føroyski bólkurin Tunghoyrt á pallin.
Bólkurin, sum er mannaður við fýra 19 ára gomlum tónleikarum, fekk sambært ummælaranum áhoyrararnar við sær frá fyrstu løtu.
Í 40 minuttir var talan um harðar gittarar, trummur og eina orkumikla pallframførslu, sum fekk gólvið at skelva.
Sangarin leyp eisini niður millum áhoyrararnar og helt fram at syngja mitt í fjøldini.
Morgunblaðið staðfestir somuleiðis, at Tunghoyrt fekk sera góða móttøku.
RSP fekk allan salin við sær
Føroyski rappbólkurin RSP var eisini væl móttikin.
The Reykjavík Grapevine skrivar, at áhoyrarar í øllum aldri vóru komnir at hoyra føroyskan rapp.
Bólkurin byrjaði við lagnum Ball í bil, og sambært ummælaranum fór salurin beinanvegin á gos.
Við løgum sum Fresh og Hygg eftir mær fingu rappararnir fólk at dansa, rópa og syngja við.
Undir einum lagi bað bólkurin øll í salinum seta seg niður og síðani reisa seg aftur. Sambært Morgunblaðnum gjørdi allur salurin, sum bólkurin bað.
Ein serliga kensluborin løta var, tá RSP framførdi lagið Rúmdin, sum varð ognað einum vini, ið nýliga var farin.
Ummælarin hjá The Reykjavík Grapevine lýsir framførsluna sum bæði orkumikla og hjartanemandi.
Janus Rasmussen endaði føroyska kvøldið
Seinastur av teimum føroysku tónleikarunum á pallinum var Janus Rasmussen.
Hann framførdi elektroniskan tónleik við synthesizarum, trummumaskinum og øðrum elektroniskum útbúnaði.
The Reykjavík Grapevine skrivar, at Janus skjótt fekk áhoyrararnar við sær við hypnotiserandi rútmum, pulserandi trummum og síni eyðkendu sangrødd.
Serliga verður lagið Fumes nevnt, har ummælarin rósti røddini og teimum høgu tónunum hjá Janusi.
Sambært Morgunblaðnum var framvegis stúgvandi fult í Iðnó, tá Janus Rasmussen fór á pallin.
Týdningarmikil sýnisgluggi
Iceland Airwaves er ein altjóða tónleika- og vinnufestivalur, sum á hvørjum ári savnar tónleikarar, umboð fyri plátufeløg, konsertfyriskiparar og tónleikamiðlar úr fleiri londum.
Í ár vóru fýra føroysk tónlistanøvn á almennu skránni, og tilsamans skuldu tey framføra sjey konsertir á festivalinum.
Faroe Music Export og G! Festival skipaðu eisini fyri einari føroyskari móttøku fyri altjóða tónleikavinnuni í sambandi við festivalin.
Glenn Larsen, leiðari í Faroe Music Export, hevur áður víst á, at Iceland Airwaves er ein týdningarmikil pallur hjá føroyskum tónleikarum, bæði fyri at røkka nýggjum áhoyrarum og skapa altjóða sambond.
Góða móttøkan í íslendsku miðlunum vísir, at føroysku tónleikararnir hava gjørt vart við seg á ársins festivali.
Keldur: Morgunblaðið og The Reykjavík Grapevine, 7. november 2026.
