Hervør Pálsdóttir, sum sjálv er limur í Rættarnevndini, hevur biðið um at fáa málið aftur í tingsalin.
Verður tað samtykt, kann uppskotið fáa aðru viðgerð á sama fundi, sum er í dag klokkan 13.
Rættarnevndin hevur havt málið síðani fyrstu viðgerð 24. september. Nevndin fekk longda freist til 4. november at lata álit, men einki álit kom innan freistina.
Krav um ráðgeving og fimm daga bíðitíð
Steffan Klein Poulsen hevur lagt uppskotið fram vegna Miðflokkin. Við tí skal óheft ráðgeving og stuðulssamrøða gerast eitt krav í sambandi við fosturtøku.
Ráðgevingin skal millum annað fevna um møguleikarnar fyri stuðli til at fullføra viðgongutíðina, stuðli eftir føðing og burturættleiðing.
Í minsta lagi fimm dagar skulu ganga millum ráðgevingina og fosturtøkuna. Í hesum tíðarskeiðinum skal kvinnan fáa tilboð um ultraljóðskanning.
Broytingar eftir 12. viku
Uppskotið broytir eisini treytirnar fyri fosturtøku eftir 12. viku.
Sambært uppskotinum skal fosturtøka tá kunna fremjast uttan serstakt loyvi, um lív og heilsa hjá kvinnuni eru í vanda, og vandin er læknaliga grundaður. Heimildin, sum eisini fevnir um at forða fyri, at likamliga og sálarliga heilsan viknar munandi, verður strikað. Í øðrum førum skal samráðið taka støðu eftir treytunum í lógini.
Harumframt verður skotið upp at strika vanda fyri álvarsligari sálarligari sjúku hjá barninum sum sjálvstøðuga grundgeving fyri loyvi til fosturtøku eftir 12. viku. Ásetingin um álvarsliga likamliga sjúku verður varðveitt.
Gudfrøðingur í samráðið
Miðflokkurin vil eisini hava ein gudfrøðing í fosturtøkusamráðið í staðin fyri sálarfrøðingin.
Eisini skulu treytirnar herðast fyri, nær samráðið kann loyva fosturtøku hjá ógiftum kvinnum undir 18 ár uttan samtykki frá foreldramyndugleikanum. Sambært uppskotinum skulu tá heilt serligar umstøður tala fyri tí.
Heilsustýrið skal eftir uppskotinum savna, viðgera og almannakunngera hagtøl um fosturtøkur. Í viðmerkingunum verður lagt upp til, at kvinnur anonymt upplýsa orsøkina til, at tær søkja um fosturtøku.
Verða broytingarnar samtyktar, er ætlanin, at tær koma í gildi 1. januar 2027.
