Aftaná 12 sigrar og ein javnleik í 13 teimum fyrstu dystunum var liðið hjá Óla Mittún, GOG í dag fyri fyrsta tapinum í bestu donsku hondbóltsdeildini.
GOG megnaði alt annað enn at liva upp til favorittleiklutin, tá teir á útivølli taptu stórt 26-36 fyri Bjerringbro/Silkeborg, ið var á odda 18-13 í steðginum.
Óli skoraði trý mál upp á fýra málroyndir, og hann legði upp til tvey mál.
GOG er fremst í deildini við 25 stigum. Teir eru fýra stig frammanfyri verandi meistararnar, Aalborg sum hevur 21 stig.
Liðið hjá Jóhan á Plógv Hansen, Skanderborg-Aarhus vann á heimavølli 35-33 á Ribe-Esbjerg. Í steðginum var Ribe-Esbjerg á odda 20-19.
Jóhan skoraði fimm mál upp á sjey málroyndir.
Skanderborg-Aarhus er nummar fimm í deildini við 18 stigum.