Tvey føroyingalið vóru í leiki í bestu donsku mansdeildini í hondbólti í dag.

Liðið hjá Paula Hentze Rasmussen (myndin) og Jákupi Egholm, TMS Ringsted vann á heimavølli 32-26 á Nordsjællandi. Í steðginum var Ringsted á odda 20-14.

Talan er um fyrsta sigurin hjá Ringsted í hesum kappingarárinum.

Pauli skoraði eitt mál upp á tvær málroyndir.

TMS Ringsted er næstaftast í deildini við trimum stigum.

Liðið hjá Magnusi Árasyni, Mors-Thy tapti á heimavølli greitt 24-34 (10-17) fyri Sønderjyske.

Magnus skoraði eitt mál upp á tvær málroyndir, og í eina førinum vann hann bóltin í einari álopsstøðu hjá mótstøðuliðnum.

Mors-Thy er fjórðaftast í deildini við seks stigum.