Í morgun hava verið fleiri harðar spreingingar í høvuðsstaðnum í Saudi Arabia, Riyadh.

Tað vita AFP-tíðindafólk í býnum at siga.

Stutt fyri, at spreingingar vóru at hoyra, høvdu myndugleikarnir sent út ávaringar um, at fíggindaligir "lutir" vóru í loftrúminum yvir høvuðsstaðnum.

Seinastu tíðina hevur uppreistrarbólkurin, houthi'ararnir í Jemen, hert álopini á Saudi Arabia.

Í gjár vistu tíðindastovur at siga, at fýra fólk høvdu fingið løstir í høvuðsstaðnum, Riyadh. Hetta hendi, eftir at vrakleivdir frá niðurskotnum rakettum duttu niður.

Reuters veit at siga, at tey løstaðu vóru tvær kvinnur, ein maður og eitt barn. Lagt verur aftrat, at vraklutir eisini gjørdu skaðar á fimm íbúðir.