Óli Mittún og liðfelagarnir í GOG spældu í kvøld toppdyst í bestu donsku hondbóltsdeildini á útivølli móti Ribe-Esbjerg.
Frammanfyri 1.505 áskoðarum í Blue Water Dokken høllini í Esbjerg vann GOG 36-31 á heimaliðnum. Í steðginum var GOG á odda við einum máli, 14-13.
Óli skoraði fimm mál upp á níggju málroyndir, og hann legði eisini upp til seks mál. Manuel Zehnder var við 10 málum toppskjútti hjá GOG.
GOG er nú einsamalt oddalið í deildini við 13 stigum. Ribe-Esbjerg og Aalborg hava 11 stig hvør.
Leygardagin klokkan 15 verður eitt brak av einum dysti í Svendborg Arena, tá GOG tekur ímóti verandi meistarunum, Aalborg. Dysturin verður vístur beinleiðis á danska TV2.
